Көкшетау қаласында алғашқы такси 1948 жылы пайда болды. 1954 жылы № 2 автобазадан такси паркі ұйымдастырылып, ал 1957 жылы 27 «Победа» автокөлігі болған.
1961 жылы қала көшелерінде он шақты такси жұмыс істеп тұрды.
1971 жылы Көкшетау көлік басқармасының жолаушылар автотрестіне 22 «Волга» және «ГАЗ-24» маркалы автокөліктер берілді.
1978 жылдың күзінде қалалық жүк көлігі басқармасы жас жұбайларға қызмет көрсетудің жаңа түрін енгізді. Автокөлік компаниясы оларға некені тіркеу үшін арнайы жеңіл автокөліктер жалға берді. Автомобильдер символикалық неке жүзіктерімен, гүлдермен, ленталармен, орыс және қазақ тілдерінде «Бақытты болыңдар, жас жұбайлар» деген жазулармен безендіріліп, көлік есіктері ою-өрнектермен көмкерілді. Осындай қызмет көрсету туралы тапсырысты АХАЖ бөліміндегі көлік кәсіпорынның агентіне беруге болатын.
Көкшетаудың көрікті жерлері мен тарихи орындарына үш маршрут ұйымдастырылды.
1986 жылдың желтоқсанында такси компаниясы алғаш рет жас жұбайларға «Чайка» автокөліктерін ұсына бастады.
